قالت البنت : أبي عرس بسيط مابي عرس تحضره نص الدوحه
قالت الجده: سكتي ولا كلمه شقاصرج عن باقي البنات !!
قال الولد : مأعندي أكثر من 80،000 حق الشبكه
قالت الأم: تبي تفشلنا ! شبيقولون الناس!!
من يومين بدينا مناقشه موضوع الزواج في قطر على تويتر خلال هذا الهاشتاق #marriageQatar
حفله بسيطه فالبيت ولا قاعه صغيره.. ومعازيم من الأهل والأصدقاء ويعدي اليوم بدون إسراف ويعيشون طول العمر في تبات ونبات .
كنت أظن ان مافي حد يفكر بهالطريقه..واكتشفت ان (أغلبيه) فئه الشباب نشوف ان طريقه أعراسنا غلط .. وان إلي يصير برغبه الأهل من الطرفين .
الموضوع لو انترك للبنت والشاب راح يتم بطريقه مغايره للي يصير ..
لازم فالبدايه نقتنع بهذي الفكره ونطبقها ومانتردد ولا نخضع لعادات وتقاليد خطأ .. احنا مش مجبورين نبين حق الناس ان نقدر نسوي كل هالفنتك..لازم نسرف عشان نرضى الناس!!ونغضب ربنا؟
الموضوع مش موضوع ماده فالدرجه الأولى .. حتى لو كان الشخص أو بالأحرى أهله مقتدرين .. لازم نعرف وين نصرف فلوسنا ..
هل نصرف على ليله وحده ونعيش كم سنه ندفع ثمن هالليله ولا نحط الفلوس في شيء ينفعنا احنا وعيالنا فالمستقبل
نقطه ثانيه لازم نفكر فيها ..ليش تفكيرنا ينصب على المهر وليله العرس وشهر العسل ..وننسى الحياه إلي بعدها؟
همسه إلى الأهل:
إذا أتاكم من ترضون دينه وخلقه فزوجوه..
عمره المستوى المادي ما كان سبب لسعاده الناس .. والحياه مليئه بالقصص
تناتيف:
*لاتقارن أبدا بين السياره والمهر
*لاتشرطين وتحملين الرجال فوق طاقته وأنتي راضيه بمستواه من وافقتي عليه
*لاتبدون حياتكم بقرارات غيركم
* لا تصرف مافي الجيب ولما يجئ وقت العرس تقول ماقدر
وقفتنا ومناقشتنا أثرتني شخصياََ ..
دمتم~
مجاراه لموضوع يمس حياتنا اليومية..نتمنى يطلع نقاش هاشتاق الزواج في قطر بنتيجه ملموسه في تفكير الاجيال وتوعية الآباء والأمهات بتغير متطلباتهم الحياتيه وتوجهاتهم المستقبلية
ردحذفتحياتي
عبدالله
المشكله مب مشكله أهل وله مشكلة عقليات قديمه المشكله أنه المجتمع يحب يتكلم ومحد يصلح الغلط الكل يتكلم ولمه يجي دوره في تطبيق الشي تلقاه مع الخيل ياشقره ما يعدل الوضع لو سئلته عن السبب بيقول لك بكل بساطه انسان واحد مايغير وهاي سبب كل شي غلط لو كل فرد خذ موقف كان حال المجتمع والأمه أحسن التصرفات الفرديه هي السبيل للرقي الثورات اللي طيحت أكبر طغات العصر الحديث كانت بسبب أفراد حرك شعوب الشاب و البنت يضغطون على أهلهم عشان سياره أو شنطه بس في موضوع الزواج لمه أمه أو امها تقول لها مايصير أقل من جي ما تفتح حلجها وتحاجج أمها خوفا من نظر المجتمع أو سكوت منها على الغلط لانه في جزء داخلي راضي عن اللي يصير مع ان كلمها يستنكر الفعل . كلنا نرردد اذا جاءكم من ترضون دينه و خلقه بس ماشفت تطبيق للأسف ....ان شاء الله جيلنه اللي ترس المنتديات و البلوجات بكلام مليء بالمثاليه يكون في الصج مثالي
ردحذفودمتم سالمين